Ismael Hipólito Djata

Sakur

Sakur, bo tém pasensa!

Bo disan n'pasa ku nha dur

Ké nha kaminhu lundju di ianda amanha

Alan n´ruma nha gasadju,

Bas di trubada pukéntadur.

Ké n´kargantadu kinoba di tchôr,

Recadu di nha djintis…

Nha pubis!

Sintadu na stera de kasabi

Ku Ordidja kaminhus,

Kikias, manél fugons…

Ku barigas pinpinhidus di dur,

Pés di djigans,

Bokas de urdumunhu,

Bo tchôlonan ku bombolon

Paka aós bim sédu amanha.

Sakur, bo tém pasensa!

Ndé ku bo na léba djugugugus

Ku noti na kumpanha bagabagas.

Ku sereno ku na serenan.

Ké, bo noba prenha dur!

Só dur ku bo ta pun n'miskinha,

Ké di ki rapasiadas?...

Ké di ki mininus ku ka pudi soronda

Na tera ku na durmi, mortos nega ronka na sonu.

Bo tokan nha kundere!

Nos n'ta punta ké di nha djintis

Di nha forobas, di nha foli ku pis,

Nha madeira, nha bausiti, nha banana santchus.

Té kal dia,

Kun na karga bo djongagu

Djanborérés, kinankois

Paka aós bim sedu amanha,

Pa ka larmas bim laban kanblétch.

Otcha i son sabura, sin foronta…

Té kal dia… té kal dia…

Nha Badjuda

Falan undé ku bo sta nél

Ké n´bai na kada moransa,

N'djopôti na kada tapada,

N'ka odja nha badjuda.

N'punta kada fulano ku na pasa

Na undé ku bo sta nél,

Ka bo disa sintidu terbesa na bentu.

Ké n'miskinha n'kansa, n'tchora n'kansa.

Falan undé ku bo sta nél

Ké n´djarga n'djarga na kada sukuru,

N'punta bida di bo, ku mi.

N'ka odjau…

N'guirtau na língua di tudu djintis, badjuda.

N´pili, Ponu, Djuô, Sunkutu ba, Kampôni, Nbifula,

Ké bo djudan buskal,

kin ku odjan nha badjuda, Deus na pagal.

N'buskal n'kansa, n'peral n'kansa

Bas di sol ku tchuba

N'kuri tras di dia ku noti

Nin si kinoba di kurpu…

Alin sikidu

N'na pera nha kerensa

Na roda di mar

N´tené história na roda di mar

Suma urdumunho na tempu di kunfentu.

Nha kudadi na presa suma remu di nhominka

I na bua suma kikia matchu

Sin un ramu pa i diskansa si presa.

Alin suma kutô

Ku na gasali tchôn pan ntera sintidu.

Sintidu na pukentan na roda di mar

Pa ora ki tchiga pa no rolanta kurpo na reia

Pa no ninanta n´utru suma lua riba di mar

Pan bibi na si boka,

nos n´sinti sabura di nha tera nha si bis.                                                                                                   

Ami ku bo

Ami ku bo

I suma séu ku tera,

I suma noti, ku dia,

I suma kasabi ku alegria,

Asin ku é misti odjanu.

Ami ku bo

I suma kurpo sim bida,

I suma sol ku lua,

I suma sangi ku veia,

Asin ku é misti odjanu.

Ami ku bo

I suma gloria ku inferno,

I suma claresa ku sukuro,

I suma polon sim lã,

Asim ku é misti odjanu.

Ami ku bo i té kanbansa dês mundo

Kau pudi bida sukuro nha udjus di fidalgos

É pudi tisi barudju medunhos de mar

Turbadas sin bentu, Barudju de pedras

Ampus…

Bo bonitasku i suma iagu doce

Ku strelas ta djamun na kada noti di lua badjuda.

Bo disanu no fasi n´dulé‐n´dulé

Pa kontal Konbersas bonitus ku na intchi si kabesa,

Pa i ronkanta i kanta si fidju di os,

És ki no sélinbiku‐sélinbiku.

N´misti scribi un poema

N´misti scribi un poema!

Un poema,

Na tudu língua di mundo,

Bo kalanta armas, bo obin…

Bo sukuntan…

N´misti fasi un poema!

Na undé ku guera ka tém

I so soségo ku ermondadi,

Undé ku prenthéntchén na soronda.

Bo disan n´scribi un poema

Na undé ku katchus na kumpu sé ninhos,

Mindjeris ka na karega sé mons,

Omis na barsa utrus,

Undé ku no na guirta liberdadi.

Liberdadi, liberdadi… liberdadi…

Na undé ku fomi ka na turtura

Sedi kana sekanta no gargantis

Balas kana nterga kurpo na inosentis,

N´gosta!

Di scribi um poema

Na gagalhadas di tudu padidas,

Na batukada di noti,

N'gosta di odja mininos na djumbai

É na brinka kabra‐ségu, é na djuga mália.

N´gosta di scribi un poema

Na un mundu sin turmento,

Sin ditadura, sin bumba atómica, sin rasa,

Na undé ki anós tudu i un son.

N´misti scribi un poema!

Bo disan n´fasi um poema

Na és tchôn ki anos tudu i un ramo di flur.

Distansia

Ôtcha bu na djubin

Bu udjus intchim de mar

Nha alma na pukéntan,

Suma son de sikô,

Suma sol di mis di Abril.

Na ki tardi ku bu nenin forti

Bu pertanda bu kurpu ku dimi.

Nha korson bati forti,

Sangi rapian, i fasin frio.

Na ki ora!

Na ki momentu

Ningin di nos tené ba fala…

Na és ora!

Na és dia,

Si bu ri, n'ta tchora

Si n'kumé, bu ka ta kumé.

N´medi, é sukuru ku na kumpanhan,

Na mandurgada entre tchuba ku bento.

Bo kordan.

Na ki ora

Na ki dia

Bu dan beju, bu beju kinti dimas

Bu fala ami i kindin‐kondon na bo amor

Ami ki bu rapaz

Nha Alma i bu alma

Na mal ou na bem

Ami ki bu mundo

Nada ka pudi distansianu.

Aos n'déu... n´dém…

badjuda nbombô

badjuda ku si kefrandadi kamba mar

badjuda preta di nha tera

ku bonitasku toma konta di nha udjos

suma fidju djilinkundi.

badjuda nbombô

badjuda preta di nha bida

ku djamudu suma lua riba di mar

ku ta disan sikidu bas di pé di mango di tia Saba.

son pa n'odja si nobresa.

kada si paso i un kompaso di kamalion.

Badjuda nbombô

badjuda preta di nha rua

bu ta balansa kurpo sabi dimas,

suma kerensa di bentu ku folias.

badjuda nbombô

badjuda preta di nha KORSON!

ku inchisin di tchéru di cantiga

ku dan kerensa pa és bida i pa tudu bida,

bu na fika sikidu dentru di nha pitu.

Ampus!

kuma tugas i era ba maus

é mata no donas,

é sikotia no mamés

na brinkadera di n´dulé‐n´dulé.

si kaliar, si kaliar...

ké di nos?

ké di nos?

si kaliar, si kaliar...

é libertanu pa matanu,

na noti di cabra‐cego

é bin ku nomi democrasia.

ké di nha pubis,

ku ka sibi si noti kumpridu

ké di nha prentchentchéns

ku ta nenin tchuba.

ké di nha mindjeres,

ku ta matan fomi.

si kaliar, si kaliar...

bo kalantan nha alma

ampus!

homens medronhu

na tera doenti,

na tera sukuro,

na tera di djintis amontons,

baléntis só na pitu di mindjeres.

Abos balenti…

si kaliar, si kaliar...

i droga,i prostutison,

bandidos stan na tera

fildagos stan na tera.

ampus!

ampus… ampus k´di nos?

si kaliar… si kaliar nada.

Bo sufri

Padidas bo sufri

Ali tchuba bim falanu mantenha

Di ki sangis ku darma sin nada.

Bolanhas dingui ku sé rumpi tendas

Nha pobis mons caiambradus,

Djudjus mole,

Fidjus di sakalata.

Na sibilizason di lixu ku luxu

Lá ku é fasi kasamentu di djiba.