N´misti durmi

ma udjus ka seta

cada biás kê bai pa fitcha

ala ki sombras na bin

sombras di mofinus

mofinus ku arma na mon

ala n´ten ku sta di planton

guarda di cassa n´sedu

pa tadja mangaçon di canadjas

N´misti durmi

ma oredjas ka seta

é na zina

é na lembrantam kuma

é obi elis na n´djata

kuma terra i di sêlis

kuma pecaduris ku sta la

i limárias di sê kintal

ora kê cumé é ka farta

anta son pa dogola kil limárias

N´misti durmi

ma corçon ka seta

pupa pupado

Ai Guiné

i abô dê?

anta dê...

crus crede sacur na blola

N´misti durmi

ma Guiné

nha terra

nha mamê

nha dunu

nha kassabi

nha sabura

pidin pan finka udju nel

i kil  gora N´na

sintinela ka ta durmi...

Didinho

24.06.2009